Ro‘yxatga olish to‘g‘risidagi qarorni olish uchun ariza beruvchi quyidagi hujjatlarni Kadastr agentligiga taqdim etadi:
a) ariza.
Arizada quyidagilar ko‘rsatiladi:
yuridik shaxsning nomi, STIR, pochta manzili, elektron pochta manzili (agar mavjud bo‘lsa), xizmat ko‘rsatuvchi bankning nomi va hisobvarag‘i, telefon raqami;
geodeziya va (yoki) kartografiya faoliyatining tegishli turi bo‘yicha xabarnoma qabul qilinganligi haqidagi tasdiqnoma raqami;
b) geodeziya va kartografiya ishlarini bajarishga texnik loyiha (dastur).
Unda quyidagilar aks ettiriladi:
texnik loyiha (dastur) ishlab chiqish uchun asos bo‘lgan texnik topshiriq va texnik shartlar;
ish ob’ektining nomlanishi, buyurtmachi to‘g‘risida ma’lumotlar, moliyalashtirish manbalari, ishlarni bajarish muddatlari;
ish obyektining tabiiy-geografik xususiyatlari va joylashgan joyi;
obyektning geodezik, topografik, aerokosmik va kartografik o‘rganilganligi (o‘rganilganlikning tegishli bo‘limi rejalashtirilayotgan ish turlariga binoan tanlanadi);
rejalashtirilayotgan ish hajmi va turlari, amalga oshirish texnologiyasi tavsifi;
obyektda ishni tashkil etish va tugatish tadbirlari;
mehnatni muhofaza qilish va xavfsizlik texnikasi;
ishlarni tekshirish va qabul qilish tartibi;
ishlarni bajarish grafigi;
ishlarni amalga oshirish smetasi va texnik-iqtisodiy hisoblari.
Talabgor yoki uning nomidan ish yuritish vakolatiga ega bo‘lgan shaxslar elektron raqamli imzosidan (ERI) foydalangan holda ruxsat etish xususiyatiga ega hujjatni olish uchun Litsenziya AT yoki YaIDXP orqali ariza yuboradi.
Geodeziya va kartografiya ishlarini ro‘yxatga olish to‘g‘risidagi ruxsatnomaga ariza yuborish tartibi Vazirlar Mahkamasining 2022-yil 22-fevraldagi “Maxsus elektron tizim orqali ruxsat etish xususiyatiga ega ayrim hujjatlarni berish tartib-taomillari to‘g‘risidagi yagona nizomni tasdiqlash haqida”gi 86-sonli qarori bilan tasdiqlangan nizom va ushbu nizomning 9-ilovasida belgilangan.